خذني على قد الغلا والمعزه
بشويش يا الغالي على روحي


فنجان ودك مول أبد لا تهزه
دامه قناد الود يا الغالي يفوحي


فزيت من زود الوله لك فزه
معها تلعثم منطقي مع بوحي


كأنه غلاكم في القلب يبتزه
ينهار لأجله حتى أعلى صروحي


خنجر بعادك لا تشهره وتغرزه
وسط صدري بلا أمل وتروحي


لو كان روحي بحبكم معتزه
باب اللقاء إتركه لي مفتوحي


واسمح بقربك كل حين وحزه
دام اللقاء يا وليفي مسموحي


الصدر يتبع بكل بيتٍ عجزه
لأجل يترابط بالمعاني ويوحي


وانتوا غلاكم ما فهمنا لغزه
بتروح وإلا لك رجا وطموحي



لا تستوي بالحب مثل الخرزه
تروح مع هبة نسيم الدوحي






عهود