منتديات شقاوي التجريبية - حقيقة بُكاء صـلاح الديـن الأيـوبي من النَّـار المُقَـدَّسَة

حقيقة بُكاء صـلاح الديـن الأيـوبي من النَّـار المُقَـدَّسَة

ملف مرفق 64302

- انتشرت بعض الأقاويل أن في السنة الذي فتح فيها السلطان صلاح الدين الأيوبي القدس عام 1187م، طلب من المسيحيين أن يحضر معهم الإحتفال بعيد القيامة، ويقولون أنه عندما ذهب "نزلت نار من السماء تُضِيء شموع الكنيسة" .. فبدأ مساعديه بالتحرك من الخوف، وبدأ المسيحيون في تمجيد ربهم.
عندها قال جنود المسلمين أن هذه خدعة، فمسك صلاح الدين شمعة اشتعلت من هذه النار ، وكلّما يُطفئها تشتعل النار المقدسة فيها مرةً أخرى، وجرب ذلك اكثر من مرة حتى أيقن صلاح الدين أنها مُعجزة من الإله .. فبكى وقال : «نعم، قريبًا سأموت، أو سأفقد القدس» وقد تحقق كلامه ومات فى الصوم الكبير التالي.
[IMG alt="▪️"]https://static.xx.fbcdn.net/images/emoji.php/v9/td3/1.5/16/25aa.png[/IMG]ده الكلام اللي انتشر وناس كتير عايزة تعرف الحقيقة صح أو غلط !
أولاً ، اية هو المصدر اللي انتشرت منه القصة دى عن صلاح الدين الأيوبي ؟!
في الأول نشرها موقع مسيحي باللغة العربية، وأغلب المواقع والصفحات المسيحية نسخت منه القصة ونشرتها من بعديه، والموقع اسمه ( Newmiracles ) وده كان اول موقع ينسخها لـ اللغة العربية.
طيب نقلها منين ؟!
نقلها من كاتب دنماركي مسيحي أسمه ( Niels Christian ) ونشر القصة في كتاب خاص بيه اسم الكتاب :
‏" Mirakler - møder mellem himmel og jord ".
المهم الكاتب ده مش ناشر أي مصادر غير من شخص واحد فقط أسمه "Geoffroi ou Gauthier Vinisauf".
طيب مين الشخص ده ؟! .. يقال أنه مؤرخ مسيحي أتكلم عن الحروب الصليبية وأنه توفي في القرن 13 الميلادي .. ولو عملت سيرش عن أسمه مش هتلاقي أي معلومات عنه غير ناس بتقول ان ليه كتاب أسمه :
‏"Gautier Vinisauf Histoire des croisades"
أو
‏ " Histoire des croisades "
في الحالتين مش هتلاقي الكتاب ده او مصدر يقولك أن الكتاب خاص بالشخص ده؛ ولو فضلت تدور في أغلب المواقع مش هتلاقي، وحتى الكتب اللي موجودة بنفس الإسم أو قريبة من الإسم، هتلاقيها منسوبة لأشخاص تانية؛ والمفروض اصلا يكون موجود على مواقع الكتب الكبيرة والمكتبات، خصوصا أنه زي ما بيتقال مؤرخ قديم وبيقولوا مشهور.
"الشخص اللى هيشكك في الكلام ده، لو معاك نسخة من الكتاب بإسم المؤرخ ده حطها في التعليقات"
وفي ناس بتقول ان الكتاب بتاعه بس مترجم من شخص اسمه "Joseph Fr Michaud" وبيقولوا ان اسم الكتاب كده :
‏ " Histoire des Croisades textes de Joseph-François Michaud "
ولما عملت سيرش عن الكتاب، بيقال أنه مكتوب بقلم الشخص اللي قالوا أنه مترجمه، اللي هو "جوزيف"، وأن كمان فيه شخص تاني هو اللي مترجمه من "جوزيف"؛ فدورت في كتب الموسوعة دي اللي هما 6 كتب، مفيش أي ذكر للقصة نهائي !!
ولو بحثت عن الشخص المصدر الأساسي من البداية اللي هو "Gauthier Vinisauf" واللي اتقال أنه مؤرخ واتوفى في القرن 13 الميلادي، لو بحثت عن أي معلومات عنه بمصادر مش هتلاقي.
حتى مفيش مصدر يقولك مثلاً ، اتولد سنة كام، توفي سنة كام، مين هو، الخ.. مش هتلاقي ومفيش حد بيتكلم عنه بطريقه مباشره، حتى مفيش مصدر واضح بيقول انه مات في القرن 13 الميلادي؛ ده حتى ويكيبيديا المنصّة العالمية مذكرتش أي تفاصيل عنه.
( وتاني اللي هيشكك في كلامي ينزل مصدر معلومات عنه يكون موثوق منه، وينزل نسخة من كتابه الرسمي ومعاها نسخه من القصة من كتابه، او حتى دليل ان الشخص اللي اسمه چوزيف ده مترجم كتابه ).
نيجي لحاجة مهمة، موقع اسمه " holy fire " بيحكى القصة برضو وبيتاخد كمصدر، وعلشان أسهلها عليك، دور علي التــ1187ــاريخ ده، وأول ما توصل ليه اقرأ القصة.
لينك الموقع اهو :
‏http://www.holyfire.org/eng/history.htm
الموقع بيقول أن "Gautier Vinisauf" المصدر الرئيسي للقصة بيوصف اللى حصل .. فـ بيقول في العام اللى فتح صلاح الدين فية القدس اللي هو 1187م ، في نفس العام ده طلب صلاح الدين أنه يحضر احتفال عيد القيامة مع المسيحيين.
واحدة واحدة كدة .. دلوقتي هو بيقول ان صلاح الدين فتح القدس في سنة 1187، وفي نفس السنة ذكر برضو انه طلب يحضر الاحتفال معاهم !! والكلام من الموقع اهو مش احنا اللى بنقول.
واللي ميعرفهوش واللي معظم المصادر التاريخية ذكرته، أن السلطان صلاح الدين لما فتح القدس، في نفس السنة كان هيهدم الكنيسة اللي هما بيقولوا انه راح يحضر الاحتفال فيها .. لكن المسلمين فكّروه بسيدنا "عمر بن الخطاب" لما فتح البلد دي وأنه معملش حاجه في الكنسية.
ساعتها صلاح الدين ترك ليهم هو كمان الكنيسة على حالها من غير ما يهدمها وده تأسيًا بسيدنا عمر، لكن مسابش فيها حد من المسيحين، غير أربعه فقط يخدموها، وحال بين بقية المسيحيين والكنيسة؛ وده اللي مذكور في معظم المصادر التاريخيه الموثوق منها واللي ليها تاريخ ومصدر.
وده دليل أن السنة اللي فتح فيها القدس مراحش الكنيسة يحضر الاحتفال زي ما مذكور في القصة .. لإن مش طبيعى واحد عايز يهدم الكنيسة ومنع المسيحيين يدخلوها وساب فيها أربعة بس، وفي نفس السنة يطلب يحضر الإحتفال معاهم !!
وفى اقاويل منهم بتقول .. أنه لما عمل صلح مع الملك بتاعهم طلب بعديها انه يحضر الاحتفال !! .. والصلح ده معمول عام 1192 أصلًا.
طيب منين طلب يحضر الإحتفال أول ما فتح القدس فى عام 1187، ومنين طلب يحضر الاحتفال بعد ما عمل صلح مع الملك بتاعهم والصلح ده معمول عام 1192 ؟!
اقوايل تانيه برضو من نفس الموقع بيقولوا فيها ان صلاح الدين لما بكى وقال سأموت قريباً او سأفقد القدس، بيقولوا كلامه اتحقق ومات في ميعاد الصوم التالى !!
لحظة واحدة ، هو مش المفروض الصوم في العقيدة المسيحية بيبقى كل عام ؟! .. طيب أزاي حضر الاحتفال عام 1187 واتوفى عام 1193، والفرق ما بينهم 6 سنين !!
يعنى في الفترة دى مكنش فيه صيام مثلا ؟!
وفيه حاجة كمان، بيتقال برضو أن المؤرخ اللي بيقول كدة بيحكي ان القصة دي حصلت في عام 1192 عشان كده الكلام اتحقق ومات في الصوم التالي سنه 1193.
طيب منين حصلت عام 1192 ومنين في الوصف كاتب في عام 1187، العام اللى دخل فيه صلاح الدين القدس، في ذلك العام طلب أنه يحضر الاحتفال ؟!
ولو بصيت في آخر القصة على الموقع هتلاقي محطوط عنوان كتاب أسمه : "معجزات هيفدت – لقاء بين السماوات والأرض " أسمه اهو :
‏"Hvidt Miracles - Encounters Between Heaven And Earth"
لو دورت كويس في الكتاب ده مش هتلاقي حرف ذاكر القصه اللي بتتقال عن صلاح الدين، ومش عارف ايه سبب وجوده في آخر القصة، ولية مش موجود المصدر الرئيسي اللي القصة منقولة منه ؟!
وحاجة كمان .. في كتاب حديث أسمه " holy light " النور المقدس ، بيتكلم عن المعجزات دي في معتقدهم وبرضو مذكرش نهائي قصه صلاح الدين والنور المقدس، مع أنه كتاب المفروض بيستشهد بحاجات زى كده بس مفيش ذكر للقصة دى ولا تاريخها حتى، وغيره من الكتب التاريخية عن الحروب الصليبية وعن المعجزات وبرضو مذكروش أي حاجه عنها.
[IMG alt="▪️"]https://static.xx.fbcdn.net/images/emoji.php/v9/td3/1.5/16/25aa.png[/IMG]في الأخر كل القصة دي وكل المواقع والناس اللي بتتكلم عنها، مصدرها شخص واحد فقط أسمه :
‏( Geoffroi ou Gauthier Vinisauf )
مفيش عنه أي معلومات كاملة تعرفك هو مين .. وكل المصادر زي ما ذكرت فوق مش صحيحة وملهاش أي علاقة بالقصة، والموقع اللي المفروض متاخد كمرجع تاريخي طلع ناشر قصه غلط والمصدر اللي محطوط ملهوش أي علاقة بيها.
غير ان فيه مواقع وكتب تانيه بتتكلم عن الفترة دي ومذكرتش حاجة عن الكلام ده، ولا ذكرت حاجة عن الشخصية دي؛ وأنا مش بقول أنه شخص ملوش وجود، لكن بقول أن مفيش معلومات عنه تخليك تعرف مين المؤرخ ده حسب قولهم علشان تصدق كلامه اللي مش موجود أصلًا.
[IMG alt="▪️"]https://static.xx.fbcdn.net/images/emoji.php/v9/td3/1.5/16/25aa.png[/IMG]الخـلاصـة :
القصة دي تأليف وملهاش أي أساس من الصحة، واللي خلاني أكتب الكلام ده كله، لإن السلطـان صـلاح الديـن شخصية عزيزة على كل مسلم، وانا شخصيًا مش هقبل أن شخص مسلم متوفي لا يستطيع الرد يُفترى عليه بقصص مكذوبة ملهاش أي أساس من الصحة.